ონლაინ ყიდვა-გაყიდვა

• ტექნოლოგიის, ლოგისტიკის, გადასახადებისა თუ სანდოობის კუთხით არსებულმა მიღწევებმა, ინტერნეტსა და მობილურ საშუალებებზე ხელმისაწვდომობის ზრდასთან ერთად, ბევრად გაამარტივა მომხმარებლის ცხოვრება: შეიქმნა გლობალური ონლაინ სავაჭრო სივრცე, სადაც მილიონობით მომხმარებელი აღარ დადის საყიდლებზე, რადგანაც ნებისმიერ წამს სახლიდან გაუსვლელად შეუძლია იყიდოს მისთვის საჭირო პროდუქტი თუ მომსახურება.

• საცალო ვაჭრობაში ჩართულმა ბიზნესმა განსაკუთრებით უნდა მიაქციოს ყურადღება მისი პოტენციური მომხმარებლის მოთხოვნილებებს თუ როდის და სად ამჯობინებენ ისინი პროდუქციის შეძენას.

პროდუქციისა თუ მომსახურების ონლაინ შეთავაზებისას, გაითვალისწინეთ შემდეგი:

• გეოგრაფიული თავისებურება: შესაძლოა, თქვენს პროდუქტებზე ონლაინ მოთხოვნილება რეგიონების მიხედვით განსხვავდებოდეს. თუ თქვენ შიდა ბაზარზე ხართ ორიენტირებული, ინტერნეტზე წვდომა და ონლაინ ყიდვა-გაყიდვის პრაქტიკა შეიძლება განსხვავებული იყოს დიდ ქალაქებში (მაგალითად, თბილისი, ქუთაისი, ბათუმი) და შედარებით პატარა ქალაქებსა თუ სოფლებში. თუ თქვენს პროდუქციას გლობალურ ბაზრებზე სთავაზობთ, როგორც წესი, მომხმარებლები უმეტესად იქნებიან აზიის, ჩრდილოეთ ამერიკისა და დასავლეთ ევროპის ქვეყნებიდან და ნაკლებად სხვა დანარჩენი რეგიონებიდან.

• ასაკობრივი ფაქტორი: თუ თქვენი მომხმარებლები ძირითადად უფროსი თაობის წარმომადგენლები არიან, ნაკლებ სავარაუდოა, რომ ისინი ვაჭრობისთვის მასიურად იყენებდნენ ონლაინ პლატფორმებს.

• პროდუქციის ნაირსახეობა: ისეთი პროდუქტები, როგორიცაა წიგნები და მუსიკა, ადრეულ ეტაპზევე გამოჩნდა ონლაინ სივრცეში და ახლა, როგორც წესი, უმეტესად სწორედ ინტერნეტში იყიდება. ბოლოდროინდელი ტენდენციებით კი კვებისა და ტექნიკის მიმართულებაც სულ უფრო მეტად ინაცვლებს ონლაინ სივრცეში.

• მოწყობილობათა პარამეტრები: მოწყობილობები, რომლებსაც მომხმარებლები იყენებენ შესყიდვებისთვის, განსხვავდება რეგიონებისა და თაობების მიხედვით. შესაბამისად, თქვენი ინტერნეტ მაღაზია უნდა მოარგოთ იმ მოწყობილობებს (მაგალითად, კომპიუტერი, ლეპტოპი, ტაბლეტი, სმარტფონი), რომლებსაც აქტიურად იყენებენ თქვენი მომხმარებლები. თითოეული ეს მოწყობილობა მოითხოვს თავისებურ მიდგომას.

• პერსონალიზაცია - ინდივიდუალური ყურადღების გამოყენება ემოციური კავშირის გასაზრდელად

• პერსონალიზაცია ყველაზე ღირებული კომპონენტია. ეს აჩვენებს, რომ გესმით თითოეული მომხმარებლის საჭიროებები და ითვალისწინებთ მათ გამოცდილებას. სახელების გამოყენება, ინდივიდუალური ყურადღება, ინტერესების ცოდნა და წარსული ურთიერთქმედებები აჩენს ინდივიდუალიზმისა და უშუალობის განცდას.

• დრო და ძალისხმევა - მარტივი პროცედურების შექმნა და მომხმარებელთა ძალისხმევის შემცირება

• მომხმარებელთა დრო ფასდაუდებელია და ისინი უმეტესად საქმის მარტივად და მყისიერად მოგვარების გზებს ეძებენ. მომხმარებელთა კმაყოფილების გაზრდა შეგიძლიათ ზედმეტი დაბრკოლებებისა და ბიუროკრატიის მოხსნით, რათა მათ სწრაფად და მარტივად შეძლონ სურვილებისა და მიზნების შესრულება. ხშირად დრო არის ერთ-ერთი მთავარი ფაქტორი კონკურენტული უპირატესობის მოსაპოვებლად. დროის ეკონომიით ხარჯების შემცირებაცაა შესაძლებელი თუ, რა თქმა უნდა, ამით სხვა პრინციპები არ ირღვევა. მაგალითად, შეგიძლიათ გამოიყენოთ ე.წ. „ონლაინ ურიკები“ (როცა მომხმარებელს შეუძლია ონლაინ სავაჭრო პლატფორმაზე მოძრაობისას ხელის ერთი დაჭერით პროდუქტები ონლაინ ურიკაში გადაამისამართოს, ბოლოს ერთიანად გადახედოს თუ რის ყიდვას აპირებს, მარტივად შეცვალოს ოდენობები ან ამოაკლოს ნებისმიერი პროდუქტი).

• სანდოობა - მომხმარებელთა ნდობის მოპოვება

• ნდობა წარმოიშობა მაშინ, როდესაც მუდმივად საიმედოდ და კეთილსინდისიერად მოქმედებთ. არის შემთხვევები, სადაც ბიზნესს რთულ სიტუაციებზე საპასუხოდ შეიძლება საჯაროდ რეაგირება მოუწიოს და არის მომენტები, როდესაც თანამშრომელთა მყისიერი რეაგირებით მომხმარებლის ნდობა მოიპოვოს და აღიდგინოს. სანდოობის ყველაზე მთავარი განმსაზღვრელია ის თუ როგორ ასრულებთ დაპირებებს.

• მოლოდინები - მომხმარებელთა მოლოდინის გამართლება და გადაჭარბება

• მომხმარებლებს აქვთ გარკვეული წინასწარ განსაზღვრული მოლოდინი, თუ როგორ დაკმაყოფილდება მათი მოთხოვნილებები. ეს მოლოდინები, როგორც წესი, საუკეთესო კომპანიებთან ურთიერთობის შედეგად წარმოიშობა. მაგალითად, თუ მომხმარებელს  წარსულში აქვს ხარისხიანი პროდუქციის დათქმულ დროსა და ადგილას მიწოდების გამოცდილება, ის ამჯერადაც იგივეს მოელის თქვენგან. ამ ყველაფრის გააზრება, მოლოდინების დაკმაყოფილება და, თუ შესაძლებელია, მოლოდინების გადაჭარბება, წარმატებული ბიზნესის მნიშვნელოვანი კომპონენტია. ზოგიერთი კომპანია ზოგადი განაცხადებით უქმნის მომხმარებელს გარკვეულ მოლოდინს (მაგალითად, „ხარისხიანი მომსახურება“) ან უფრო სპეციფიკური განცხადებებით („მიწოდება 48 საათში“, „უფასო მიწოდება“, „შეგიძლიათ შეცვალოთ ან უკან დააბრუნოთ პროდუქცია“). ამ უკანასკნელ შემთხვევაში, ძნელია მოლოდინის გადაჭარბება, რადგანაც ყველაფერი მეტისმეტად ზუსტადაა განსაზღვრული, მაგრამ როცა მოლოდინი ზოგადია, იქ უფრო მეტი სივრცე გაქვთ იმისთვის, რომ ამ მოლოდინებს გადააჭარბოთ.

• პრობლემის გადაჭრა - ცუდი გამოცდილების დიდ გამოცდილებად გადაქცევა

• უკმაყოფილო და დაკარგული მომხმარებლის აღდგენა ძალზე მნიშვნელოვანია. საუკეთესოდ ორგანიზებულ საქმიანობაშიც კი არავინაა დაზღვეული, რომ რაღაც შეიძლება გაფუჭდეს. კარგი კომპანიები მსგავს სიტუაციებში, ერთის მხრივ, უსწრაფესად აბრუნებენ მომხმარებელს იმ მდგომარეობაში, სადაც უნდა ყოფილიყო, და ასევე უქმნიან ისეთ გარემოს, რომ ეს ყველაფერი შემდგომში მხოლოდ დადებითად გაახსენდეს. გულწრფელი ბოდიში და დაუყოვნებლივი მოქმედება პრობლემის მოგვარების ორი უმნიშვნელოვანესი ელემენტია.

• ემპათია - მომხმარებელთან ურთიერთობის გაღრმავების მიზნით მისი საჭიროებებისა და გარემოებების სწორად გააზრება

• ემპათია არის ემოციური შესაძლებლობა, რაც სხვის გაგებასა და სხვის მდგომარეობაში შესვლას გულისხმობს. ემპათიური ქცევები კეთილგანაწყობს მომხმარებელს და უჩენს მოლოდინს, რომ თქვენ მის სურვილებს თუ საჭიროებებს მუდამ გაგებით მოეკიდებით.

• შეგიძლიათ გამოიყენოთ გადახდის შემდეგი ვარიანტები:

• პირდაპირი ონლაინ გადახდა - თქვენი ვებ-გვერდის შექმნისას ეცადეთ მასში ონლაინ გადახდის სისტემაც გაითვალისწინოთ, რაც მომხმარებელს საშუალებას მისცემს თქვენს ვებ-გვერდზევე სხვადასხვა საბანკო ბარათის გამოყენებით განახორციელოს პირდაპირი გადახდა. ეს ვარიანტი ყველაზე გავრცელებული პრაქტიკაა და მომხმარებელიც უპირატესობას ანიჭებს მას, რადგანაც ის მარტივი ორეტაპიანი პროცედურით იძლევა გადახდის საშუალებას.

• საბანკო გადარიცხვები - მიაწოდეთ საბანკო რეკვიზიტები მომხმარებელს, სადაც თანხის ჩარიცხვის გზით შეძლებენ გადახდას. ამ მეთოდით გადახდისას, ზოგიერთ შემთხვევაში, მომხმარებელს შეიძლება დამატებითი საკომისიოს გადახდაც მოუწიოს, ასევე, ამ მეთოდით გადახდისას შეიძლება გადახდის პროცესი უფრო გაიწელოს.

• ასევე გაითვალისწინეთ, რომ ონლაინ გადახდები ეს კიდევ ერთი ისეთი სფეროა, სადაც თანამედროვე ტენდენციების გათვალისწინება მოგიწევთ. გლობალურად შეიმჩნევა მზარდი მისწრაფება ისეთი არასაბანკო გადახდის სისტემებისკენ, როგორიცაა Apple Pay, Alipay, Amazon Pay, PayPal და peer-to-peer (P2P) გადახდის სისტემები. საზრიანი მომხმარებლები ამ თანამედროვე გადახდის მეთოდებს ანიჭებს უპირატესობას.

საილუსტრაციო მაგალითი:

პატარა საცხობი, რომელშიც სამი თანამშრომელი მუშაობდა, ვერ აუდიოდა ყველა მომხმარებლისთვის სათანადო მომსახურების გაწევას. საცხობი მდებარეობდა სკოლებთან და უნივერსიტეტებთან ახლოს და შესვენებების დროს ხშირად ჰქონდა პიკის პერიოდები. ორი თანამშრომელი, რომლებიც მომხმარებლებს ემსახურებოდა, იმდენად გადატვირთულები იყვნენ, რომ ყველას დროულად ვერ ემსახურებოდნენ.

ცოტა ხნის წინ, საცხობს შეკვეთის ახალი აპლიკაცია აჩვენეს. აპლიკაციის შემქმნელებმა მისი ძირითადი მახასიათებლები და უპირატესობები გააცნეს და ფასდაკლებით შესთავაზეს სამთვიანი გამოსაცდელი პერიოდი (ჩვეულებრივი ფასის 10%).

აპლიკაციამ საშუალება მისცა მომხმარებელს შექმნან მათი რეგულარული შეკვეთების სია და განახორციელონ მარტივი წინასწარი შეკვეთა. შეკვეთების სია ავტომატურად მიეწოდებათ საცხობის თანამშრომლებს, შეკვეთის სტატუსი კი საცხობში განთავსებულ ეკრანზეა გამოტანილი.

შეკვეთებისა და გადასახადების ამ ციფრულმა მეთოდმა დააჩქარა საქმიანობის პროცესი, რითიც შემცირდა ლოდინის დრო და ხალხის რაოდენობა საცხობში. აპლიკაცია ასევე იმახსოვრებს მომხმარებელთა ქცევებს, რომლის საშუალებითაც შეიძლება გარკვეული დასკვნების გამოტანა და სერვისის გაუმჯობესება. 

აღნიშნულმა სარგებელი მოუტანა საცხობის მეპატრონეს. აპლიკაციის მონაცემებზე დაყრდნობით მას უკვე შეუძლია სპეციალური შეთავაზებები და ფასდაკლებებიც კი გააკეთოს, რაც საბოლოო ჯამში ზრდის მისი მომხმარებლის კმაყოფილებას.